ਅਜੋਕੇ ਦੌਰ ਦੀ ਗਾਇਕੀ ਮੰਡੀ ਦੀ ਭੀੜ ਵਿੱਚ, ਜਿੱਥੇ ਹਰ ਰੋਜ਼ ਨਵੇਂ ਕਲਾਕਾਰ ਉੱਭਰਦੇ ਹਨ, ਉੱਥੇ ਆਪਣੀ ਇੱਕ ਵਿਲੱਖਣ ਪਛਾਣ ਬਣਾਉਣਾ ਅਤੇ ਸਰੋਤਿਆਂ ਦੇ ਦਿਲਾਂ ਵਿੱਚ ਥਾਂ ਬਣਾਉਣਾ ਇੱਕ ਵੱਡੀ ਚੁਣੌਤੀ ਹੈ। ਇਸ ਚੁਣੌਤੀ ਨੂੰ ਸਵੀਕਾਰ ਕਰਦਿਆਂ, ਨਵੀਂ ਪੀੜ੍ਹੀ ਦੇ ਗਾਇਕਾਂ ਵਿੱਚੋਂ “ਨਵੀਂ ਬਾਵਾ” ਇੱਕ ਅਜਿਹਾ ਨਾਮ ਬਣ ਕੇ ਉੱਭਰਿਆ ਹੈ, ਜਿਸਨੇ ਆਪਣੀ ਲਗਨ, ਸੁਰੀਲੀ ਆਵਾਜ਼ ਅਤੇ ਸਮਾਜਿਕ ਸਰੋਕਾਰਾਂ ਨਾਲ ਜੁੜੇ ਗੀਤਾਂ ਰਾਹੀਂ ਨਾ ਸਿਰਫ਼ ਪੰਜਾਬੀ ਸੰਗੀਤ ਜਗਤ ਵਿੱਚ ਆਪਣੀ ਥਾਂ ਬਣਾਈ ਹੈ, ਬਲਕਿ ਸਰੋਤਿਆਂ ਦੇ ਦਿਲਾਂ ਵਿੱਚ ਵੀ ਇੱਕ ਖਾਸ ਮੁਕਾਮ ਹਾਸਲ ਕੀਤਾ ਹੈ।
ਤਪਾ ਮੰਡੀ (ਬਰਨਾਲਾ) ਦੇ ਨੇੜਲੇ ਪਿੰਡ ਦੇ ਜੰਮਪਲ ਨਵੀਂ ਬਾਵਾ ਨੂੰ ਕਲਾ ਦੀ ਗੁੜ੍ਹਤੀ ਵਿਰਾਸਤ ਵਿੱਚੋਂ ਮਿਲੀ। ਉਸਦੇ ਪਿਤਾ ਜੋ ਕਿ ਇੱਕ ਪੱਤਰਕਾਰ ਹਨ, ਅਤੇ ਮਾਤਾ ਸੁਖਵਿੰਦਰ ਕੌਰ ਨੇ ਹਮੇਸ਼ਾ ਉਸਨੂੰ ਉਤਸ਼ਾਹਿਤ ਕੀਤਾ। ਉਸਦਾ ਨਾਨਕਾ ਪਰਿਵਾਰ ਕਵੀਸ਼ਰੀ ਅਤੇ ਗਾਇਕੀ ਨਾਲ ਗਹਿਰਾ ਜੁੜਾਅ ਰੱਖਦਾ ਸੀ, ਜਿਸ ਮਾਹੌਲ ਨੇ ਬਚਪਨ ਤੋਂ ਹੀ ਨਵੀਂ ਦਾ ਝੁਕਾਅ ਸੰਗੀਤ ਵੱਲ ਕਰ ਦਿੱਤਾ।
ਸਕੂਲੀ ਸਿੱਖਿਆ ਦੌਰਾਨ ਉਸਨੇ ਸੰਗੀਤ ਮੁਕਾਬਲਿਆਂ ਵਿੱਚ ਹਿੱਸਾ ਲੈਣਾ ਸ਼ੁਰੂ ਕਰ ਦਿੱਤਾ ਸੀ। ਐੱਸ.ਡੀ. ਕਾਲਜ, ਬਰਨਾਲਾ ਤੋਂ ਬੀ.ਏ. ਦੀ ਪੜ੍ਹਾਈ ਦੇ ਨਾਲ-ਨਾਲ ਉਸਨੇ ਸੰਗੀਤ ਦੀ ਰਸਮੀ ਸਿੱਖਿਆ ਵੀ ਜਾਰੀ ਰੱਖੀ। ਆਪਣੀ ਮਿਹਨਤ ਸਦਕਾ ਉਸਨੇ ਯੂਨੀਵਰਸਿਟੀ ਪੱਧਰ ਤੱਕ ਦੇ ਕਈ ਮੁਕਾਬਲਿਆਂ ਵਿੱਚ ਇਨਾਮ ਜਿੱਤੇ, ਜਿਸ ਵਿੱਚ ਗ਼ਜ਼ਲ ਗਾਇਕੀ ਦੀ ਕਲਾਸੀਕਲ ਸ਼੍ਰੇਣੀ ਵਿੱਚ ਗੋਲਡ ਮੈਡਲ ਹਾਸਲ ਕਰਨਾ ਉਸਦੀ ਪ੍ਰਤਿਭਾ ਦਾ ਪ੍ਰਮਾਣ ਹੈ।
ਆਸਟ੍ਰੇਲੀਆ ਦੀ ਧਰਤੀ ’ਤੇ ਸੰਗੀਤਕ ਉਡਾਣ: ਪਿਛਲੇ ਕਾਫ਼ੀ ਸਮੇਂ ਤੋਂ ਮੈਲਬਰਨ (ਆਸਟ੍ਰੇਲੀਆ) ਵਿੱਚ ਰਹਿ ਰਹੇ ਨਵੀਂ ਬਾਵਾ ਨੇ ਪਰਦੇਸਾਂ ਵਿੱਚ ਵੀ ਆਪਣੀ ਕਲਾ ਨੂੰ ਜ਼ਿੰਦਾ ਰੱਖਿਆ। ਉੱਥੇ ਪੰਜਾਬੀ ਸੱਭਿਆਚਾਰਕ ਸਮਾਗਮਾਂ ਵਿੱਚ ਆਪਣੀ ਕਲਾ ਦਾ ਜੌਹਰ ਦਿਖਾਉਂਦਿਆਂ ਉਸਨੇ ਸੰਗੀਤ ਪ੍ਰੇਮੀਆਂ ਦਾ ਧਿਆਨ ਆਪਣੇ ਵੱਲ ਖਿੱਚਿਆ। ਦੋਸਤਾਂ ਦੀ ਹੱਲਾਸ਼ੇਰੀ ਸਦਕਾ ਉਹ ਆਪਣਾ ਪਹਿਲਾ ਗੀਤ ‘ਖਿਤਾਬ’ ਲੈ ਕੇ ਆਇਆ, ਜਿਸਨੇ ਉਸਨੂੰ ਇੱਕ ਗਾਇਕ ਵਜੋਂ ਪਹਿਲੀ ਪਛਾਣ ਦਿੱਤੀ।
ਚਰਚਿਤ ਗੀਤ ਅਤੇ ਸਮਾਜਿਕ ਸਰੋਕਾਰ: ਨਵੀਂ ਬਾਵਾ ਦੀ ਗਾਇਕੀ ਦੀ ਖਾਸੀਅਤ ਇਹ ਹੈ ਕਿ ਉਹ ਮਨੋਰੰਜਨ ਤੱਕ ਸੀਮਤ ਨਹੀਂ, ਬਲਕਿ ਪੰਜਾਬ ਦੇ ਗੰਭੀਰ ਮੁੱਦਿਆਂ ਨੂੰ ਵੀ ਆਪਣੀ ਆਵਾਜ਼ ਦਿੱਤੀ ਹੈ। ਉਸਦਾ ਗੀਤ ‘ਬਾਪੂ ਪੰਜਾਬ ਸਿੰਘ’ ਇਸਦੀ ਸਭ ਤੋਂ ਵੱਡੀ ਮਿਸਾਲ ਹੈ। ਇਸ ਗੀਤ ਵਿੱਚ ਉਸਨੇ ਨਸ਼ਿਆਂ ਵਿੱਚ ਗਰਕ ਰਹੀ ਪੰਜਾਬ ਦੀ ਜਵਾਨੀ ਅਤੇ ਖੁਦਕੁਸ਼ੀਆਂ ਦੇ ਰਾਹ ਪਈ ਕਿਸਾਨੀ ਦੇ ਦਰਦ ਨੂੰ ਬਹੁਤ ਹੀ ਸੰਵੇਦਨਸ਼ੀਲਤਾ ਨਾਲ ਬਿਆਨ ਕੀਤਾ ਹੈ।
ਇਸ ਤੋਂ ਇਲਾਵਾ, ਉਸਦੇ ਗੀਤ ‘ਸਲਾਹਾਂ’, ‘ਜਾਨ ਕੱਢ ਕੇ ‘ਪਿੰਡ ਗੇੜਾ’ ਮੁਹਬੱਤਾਂ ਵਾਲ਼ਿਆ ਨੇ ਵੀ ਸਰੋਤਿਆਂ ਦਾ ਭਰਪੂਰ ਪਿਆਰ ਹਾਸਲ ਕੀਤਾ ਹੈ।
2025 ਵਿੱਚ, ਨਵੀਂ ਬਾਵਾ ਨੇ ਆਪਣੀ ਪਹਿਲੀ EP “Essence” ਰਿਲੀਜ਼ ਕੀਤੀ, ਜਿਸ ਵਿੱਚ ਸ਼ਾਮਲ ਸਾਰੇ ਗੀਤ ਉੱਚ ਮਿਆਰੀ ਹਨ। ਇਸ EP ਦੇ ਗੀਤਾਂ, ਖ਼ਾਸ ਕਰਕੇ ‘ਕੁੜੀਆਂ ਚਿੜੀਆਂ’, ਨੇ ਲੋਕਾਂ ਦੇ ਦਿਲਾਂ ਵਿੱਚ ਖਾਸ ਥਾਂ ਬਣਾਈ ਹੈ। ਨਵੀਂ ਬਾਵਾ ਦੀ ਗੀਤਾਂ ਦੀ ਚੋਣ ਬਹੁਤ ਕਮਾਲ ਦੀ ਹੈ, ਅਤੇ ਉਸਦੇ ਜ਼ਿਆਦਾਤਰ ਗੀਤ ਜੱਸ ਨੱਥੋਹੇੜੀ ਦੀ ਕਲਮ ਚੋਂ ਉੱਕਰੇ ਹੋਏ ਹਨ, ਜੋ ਉਸਦੀ ਰੂਹਾਨੀ ਤੇ ਅਰਥਪੂਰਨ ਗਾਇਕੀ ਨੂੰ ਹੋਰ ਮਜ਼ਬੂਤੀ ਦਿੰਦੇ ਹਨ।
ਉਸਦਾ ਨਵਾਂ ਗੀਤ “ਵੀਜ਼ਾ ਜ਼ਿੰਦਗੀ ਦਾ” (2025), ਜੋ ਹਾਲ ਹੀ ਵਿੱਚ ਰਿਲੀਜ਼ ਹੋਇਆ ਹੈ. ਜੋ ਕਿ ਜ਼ਿੰਦਗੀ ਦੀ ਸਚਾਈ ਨੂੰ ਬਿਆਨ ਕਰਦਾ ਹੈ, ਜਿਸਨੂੰ ਬਹੁਤ ਚੰਗਾ ਹੁੰਗਾਰਾ ਵੀ ਮਿਲ ਰਿਹਾ ਹੈ।
ਕਲਾ ਅਤੇ ਸ਼ਖ਼ਸੀਅਤ: ਨਵੀਂ ਬਾਵਾ ਦੀ ਸ਼ਖ਼ਸੀਅਤ ਵਿੱਚ ਉਸਦੀ ਕਲਾ ਵਰਗੀ ਹੀ ਸਾਦਗੀ ਅਤੇ ਡੂੰਘਾਈ ਹੈ। ਉਸਦਾ ਮੰਨਣਾ ਹੈ ਕਿ ਸੰਗੀਤ ਸਿਰਫ਼ ਮਨੋਰੰਜਨ ਦਾ ਸਾਧਨ ਨਹੀਂ, ਸਗੋਂ ਸਮਾਜ ਨੂੰ ਸੇਧ ਦੇਣ ਅਤੇ ਪੀੜ੍ਹੀਆਂ ਨੂੰ ਆਪਣੀਆਂ ਜੜ੍ਹਾਂ ਨਾਲ ਜੋੜਨ ਦਾ ਇੱਕ ਸ਼ਕਤੀਸ਼ਾਲੀ ਮਾਧਿਅਮ ਵੀ ਹੈ। ਉਸਦੇ ਗੀਤਾਂ ਵਿੱਚ ਪੰਜਾਬੀ ਲੋਕਧਾਰਾ ਦੀ ਮਹਿਕ ਦੇ ਨਾਲ-ਨਾਲ ਆਧੁਨਿਕ ਸੰਗੀਤ ਦੀ ਤਾਜ਼ਗੀ ਵੀ ਮਹਿਸੂਸ ਕੀਤੀ ਜਾ ਸਕਦੀ ਹੈ।
ਨਵੀਂ ਬਾਵਾ ਇੱਕ ਅਜਿਹਾ ਗਾਇਕ ਹੈ ਜੋ ਮਿਹਨਤ, ਲਗਨ ਅਤੇ ਸਪਸ਼ਟ ਸੋਚ ਨਾਲ ਪੰਜਾਬੀ ਸੰਗੀਤ ਜਗਤ ਵਿੱਚ ਆਪਣਾ ਰਾਹ ਬਣਾ ਰਿਹਾ ਹੈ। ਉਸਦੀ ਗਾਇਕੀ ਵਿੱਚ ਰੂਹ ਹੈ, ਸ਼ਬਦਾਂ ਵਿੱਚ ਸੱਚਾਈ ਹੈ ਅਤੇ ਸਮਾਜ ਪ੍ਰਤੀ ਜ਼ਿੰਮੇਵਾਰੀ ਦਾ ਅਹਿਸਾਸ ਹੈ। ਇਹੋ ਗੁਣ ਉਸਨੂੰ ਅਜੋਕੇ ਦੌਰ ਦੇ ਬਾਕੀ ਗਾਇਕਾਂ ਤੋਂ ਵੱਖਰਾ ਕਰਦੇ ਹਨ।
ਬਿਨਾਂ ਸ਼ੱਕ, ਨਵੀਂ ਬਾਵਾ ਆਉਣ ਵਾਲੇ ਸਮੇਂ ਵਿੱਚ ਪੰਜਾਬੀ ਗਾਇਕੀ ਦਾ ਇੱਕ ਮਹੱਤਵਪੂਰਨ ਹਿੱਸਾ ਬਣਨ ਦੀ ਪੂਰੀ ਸਮਰੱਥਾ ਰੱਖਦਾ ਹੈ ਅਤੇ ਉਸਦਾ ਸੰਗੀਤ ਸਿਰਫ਼ ਸੁਣਨ ਲਈ ਨਹੀਂ, ਮਹਿਸੂਸ ਕਰਨ ਅਤੇ ਵਿਚਾਰਨ ਲਈ ਵੀ ਹੈ।
ਪ੍ਰੋ. ਪਵਨ ਖਿੱਚੀ, ਮਾਨਸਾ
ਗੁਰੂ ਕਾਸ਼ੀ ਯੂਨੀਵਰਸਿਟੀ, ਤਲਵੰਡੀ ਸਾਬੋ
ਮੋ. 9478160786
.jpg)
