ਮਾਲਵਾ ਸਾਹਿਤ ਸਭਾ ਬਰਨਾਲਾ ਵੱਲੋਂ ਬਲਦੇਵ ਸਿੰਘ ਦੇ ਨਾਵਲ ਨਲਵਾ ਜਰਨੈਲ ਬਾਝੋਂ ਉੱਪਰ ਕਰਵਾਈ ਗੋਸ਼ਟੀ

-ਨਾਵਲ ਅਣਸੁਣੇ ਚਿਹਰੇ ਅਤੇ ਕਾਵਿ ਸੰਗ੍ਰਹਿ ਮੈਂ ਗਾਜ਼ਾ ਕਹਿਨਾ ਦਾ ਕੀਤਾ ਲੋਕ ਅਰਪਣ 

ਬਰਨਾਲਾ, 15 ਸਤੰਬਰ (ਧਰਮਪਾਲ ਸਿੰਘ, ਬਲਜੀਤ ਕੌਰ): ਮਾਲਵਾ ਸਾਹਿਤ ਸਭਾ ਬਰਨਾਲਾ ਵੱਲੋਂ ਹੰਡਿਆਇਆ ਰੋਡ ਤੇ ਸਥਿਤ ਪੰਜਾਬ ਆਈ.ਟੀ.ਆਈ ਬਰਨਾਲਾ ਵਿਖੇ ਸਾਹਿਤਕ ਸਮਾਗਮ ਕਰਵਾਇਆ ਗਿਆ, ਜਿਸ ਵਿੱਚ ਵਿਸ਼ਵ ਪ੍ਰਸਿੱਧ ਨਾਵਲਕਾਰ ਬਲਦੇਵ ਸਿੰਘ ਦੇ ਨਾਵਲ ਨਲਵਾ ਜਰਨੈਲ ਬਾਝੋਂ ਉੱਪਰ ਗੋਸ਼ਟੀ ਕਰਵਾਈ ਗਈ। ਡਾ.  ਅਰਵਿੰਦਰ ਕੌਰ ਕਾਕੜਾ ਨੇ 'ਨਲਵਾ ਜਰਨੈਲ ਬਾਝੋਂ' ਨਾਵਲ ਬਾਰੇ ਆਪਣੀ ਦ੍ਰਿਸ਼ਟੀ ਤੋਂ ਨਾਵਲ ਦਾ ਮੁਲਾਂਕਣ ਕਰਦਿਆਂ ਕਿਹਾ ਕਿ ਇਹ ਨਾਵਲ ਨਾਇਕ ਸਿਰਜਕ ਧੁਨੀ  ਉਭਾਰਦਾ ਹੋਇਆ ਹਰੀ ਸਿੰਘ ਨਲਵਾ ਦੀ ਕਾਰਜਸ਼ੀਲਤਾ ਨੂੰ ਬਹੁ ਪੱਖਾਂ ਤੋਂ ਵਾਚਦਾ ਮਹੱਤਵਪੂਰਨ ਨਾਵਲ ਹੈ।ਬਲਦੇਵ ਸਿੰਘ ਦਾ ਇਹ ਨਾਵਲ ਜਮਾਤੀ ਐਂਗਲ ਤੋਂ ਖਾਲਸਾ ਰਾਜ ਨੂੰ ਦੇਖਦਾ ਹੋਇਆ ਇਸ ਰਾਜ ਦੀ ਗਿਰਾਵਟ ਵੱਲ ਜਾਣ ਦਾ ਕੇਂਦਰ ਬਿੰਦੂ ਹਰੀ ਸਿੰਘ ਨਲਵਾ ਦੀ ਮੌਤ ਨੂੰ ਮੰਨਦਾ ਹੈ। ਬੂਟਾ ਸਿੰਘ ਚੌਹਾਨ ਨੇ ਕਿਹਾ ਕਿ ਇਤਿਹਾਸਕ ਨਾਵਲ ਲਿਖਣਾ ਕੋਈ ਖਾਲਾ ਜੀ ਦਾ ਵਾੜਾ ਨਹੀਂ ਹੁੰਦਾ ਪਰ ਬਲਦੇਵ ਸਿੰਘ ਦੇ ਸਿਰੜ ਅਤੇ ਖੋਜੀ ਬਿਰਤੀ ਨੂੰ ਸਲਾਮ ਹੈ ਜੋ ਲਗਾਤਾਰ ਇਤਿਹਾਸਿਕ ਨਾਵਲ ਲਿਖ ਰਹੇ ਹਨ। ਨਾਵਲ ਬਾਰੇ ਸੰਵਾਦ ਰਚਾਉਂਦਿਆਂ ਡਾ.ਭੁਪਿੰਦਰ ਸਿੰਘ ਬੇਦੀ ਨੇ ਇਸ ਨਾਵਲ ਨੂੰ ਖਾਲਸਾ ਰਾਜ ਬਾਰੇ ਚਾਨਣਾ ਪਾਉਣ ਵਾਲੀ ਰਚਨਾ ਦੱਸਿਆ। ਮਾਲਵਾ ਸਾਹਿਤ ਸਭਾ ਦੇ ਪ੍ਰਧਾਨ ਡਾ.ਸੰਪੂਰਨ ਸਿੰਘ ਟੱਲੇਵਾਲੀਆ ਨੇ ਇਸ ਨਾਵਲ ਦੀ ਚਰਚਾ ਕਰਦਿਆਂ ਬਲਦੇਵ ਸਿੰਘ ਦੀ ਸਿਰਜਣ ਪ੍ਰਕ੍ਰਿਆ ਦੀ ਸ਼ਲਾਘਾ ਕੀਤੀ। ਡਾ.ਤੇਜਾ ਸਿੰੰਘ ਤਿਲਕ ਨੇ ਨਾਵਲ ਦੇ ਕਲਾਤਮਿਕ ਪੱਖ ਅਤੇ ਚਰਨਜੀਤ ਸਿੰਘ ਸਮਾਲਸਰ ਨੇ ਨਾਵਲ ਵਿਚ ਸਾਂਭੇ ਇਤਿਹਾਸ ਦੀ ਸ਼ਲਾਘਾ ਕੀਤੀ। ਇਸ ਮੌਕੇ ਨੌਜਵਾਨ ਲੇਖਕ ਰੁਪਿੰਦਰ ਸਿੰਘ ਰਾਮਗੜ੍ਹ ਦੇ ਪਲੇਠੇ ਨਾਵਲ ਅਣਸੁਣੇ ਚਿਹਰੇ ਦਾ ਲੋਕ ਅਰਪਣ ਵੀ ਕੀਤਾ ਗਿਆ ਜਿਸ ਬਾਰੇ ਬੋਲਦਿਆਂ ਸੁਖਦੇਵ ਸਿੰਘ ਔਲਖ ਨੇ ਕਿਹਾ ਕਿ ਇਹ ਨਾਵਲ 1947  ਦੇ ਉਜਾੜੇ ਤੋਂ ਲੈ ਕੇ ਅਖੌਤੀ ਅੱਤਵਾਦ ਦੇ ਨਾਂਅ ਤੇ ਪੰਜਾਬ ਦੀ ਨੌਜਵਾਨੀ ਦੇ ਕੀਤੇ ਘਾਣ ਦਾ ਬਿਰਤਾਂਤ ਸਿਰਜਦਾ ਹੈ। ਡਾ. ਅਰਵਿੰਦਰ ਕੌਰ ਕਾਕੜਾ ਦੁਆਰਾ ਸੰਪਾਦਿਤ ਕਾਵਿ ਸੰਗ੍ਰਹਿ ਮੈਂ ਗਾਜ਼ਾ ਕਹਿਨਾ ਦਾ ਲੋਕ ਅਰਪਣ ਵੀ ਕੀਤਾ ਗਿਆ ਜਿਸ ਬਾਰੇ ਬੋਲਦਿਆਂ ਡਾ ਕਾਕੜਾ ਨੇ ਕਿਹਾ ਕਿ ਗਾਜ਼ਾ ਵਿੱਚ ਜੋ ਹਾਲਾਤ ਸਿਰਜੇ ਜਾ ਰਹੇ ਹਨ ਉਸ ਲਈ ਇਜ਼ਰਾਇਲ ਅਤੇ ਅਮਰੀਕੀ ਸਾਮਰਾਜੀ ਤਾਕਤਾਂ ਹੀ ਜ਼ਿੰਮੇਵਾਰ ਹਨ ਜੋ ਮਾਰੂ ਜੰਗੀ ਹਥਿਆਰਾਂ ਨਾਲ ਮਾਸੂਮ ਲੋਕਾਂ ਦੀ ਨਸਲਕੁਸ਼ੀ ਕਰ ਰਹੇ ਹਨ। ਇਹਨਾਂ ਤੋਂ ਇਲਾਵਾ ਨਾਵਲਕਾਰ ਦਰਸ਼ਨ ਸਿੰਘ ਗੁਰੂ,  ਕੰਵਰਜੀਤ ਭੱਠਲ, ਡਾ. ਅਮਨਦੀਪ ਸਿੰਘ ਟੱਲੇਵਾਲੀਆ, ਡਾ. ਰਾਮਪਾਲ ਸਿੰਘ ਸ਼ਾਹਪੁਰੀ ਅਤੇ ਹਾਕਮ ਸਿੰਘ ਰੂੜੇਕੇ ਨੇ ਵੀ ਪੁਸਤਕਾਂ ਬਾਰੇ ਆਪਣੇ ਵਿਚਾਰ ਪੇਸ਼ ਕੀਤੇ । ਉਪਰੰਤ ਹੋਏ ਕਵੀ ਦਰਬਾਰ ਵਿੱਚ ਇਕਬਾਲ ਕੌਰ ਉਦਾਸੀ, ਰਾਮ ਸਰੂਪ ਸ਼ਰਮਾ, ਡਾ.  ਉਜਾਗਰ ਸਿੰਘ ਮਾਨ, ਸੁਰਜੀਤ ਸਿੰਘ ਰਾਮਗੜ੍ਹ, ਪਾਲ ਸਿੰਘ ਲਹਿਰੀ, ਪਰਮਜੀਤ ਸਿੰਘ ਰਾਜਗੜ੍ਹ,  ਪ੍ਰਿੰ ਕੌਰ ਸਿੰਘ ਧਨੌਲਾ, ਜਗਤਾਰ ਬੈਂਸ, ਸੁਖਵਿੰਦਰ ਸਿੰਘ ਸਨੇਹ,  ਜਗਤਾਰ ਜਜ਼ੀਰਾ, ਮੇਜਰ ਸਿੰਘ ਗਿੱਲ ਸਹੌਰ, ਰਾਮ ਸਿੰਘ ਬੀਹਲਾ,  ਜਸਵੰਤ ਗਿੱਲ ਸਮਾਲਸਰ, ਜੰਗੀਰ ਸਿੰਘ ਖੋਖਰ, ਸਰੂਪ ਚੰਦ ਹਰੀਗੜ,  ਐਡਵੋਕੇਟ ਕੁਲਵੰਤ ਸਿੰਘ ਧਿੰਗੜ,  ਅਮਰਿੰਦਰ ਸਿੰਘ ਦਾਨਗੜ, ਰਜਿੰਦਰ ਸ਼ੌਂਕੀ, ਇਕਬਾਲਦੀਨ ਬਾਠਾਂ, ਮਨਦੀਪ ਕੁਮਾਰ, ਸਿੰਦਰ ਧੌਲਾ, ਲਖਵਿੰਦਰ ਸਿੰਘ ਠੀਕਰੀਵਾਲ, ਮਾਲਵਿੰਦਰ ਸ਼ਾਇਰ,  ਮਨਦੀਪ ਕੌਰ ਭਦੌੜ, ਚਰਨ ਸਿੰਘ ਭਦੌੜ, ਮਮਤਾ ਸੇਤੀਆ ਸੇਖਾ ਨੇ ਆਪਣੇ ਗੀਤ ਅਤੇ ਕਵਿਤਾਵਾਂ ਪੇਸ਼ ਕੀਤੀਆਂ, ਸਭਾ ਵੱਲੋਂ ਬਲਦੇਵ ਸਿੰਘ ਅਤੇ ਰੁਪਿੰਦਰ ਸਿੰਘ ਰਾਮਗੜ੍ਹ ਦਾ ਸਨਮਾਨ ਵੀ ਕੀਤਾ ਗਿਆ | ਇਸ ਮੌਕੇ ਗਿਆਨੀ ਕਰਮ ਸਿੰਘ ਭੰਡਾਰੀ,  ਹੈਡ ਮਾਸਟਰ ਰਣਜੀਤ ਸਿੰਘ ਟੱਲੇਵਾਲ, ਅਵਤਾਰ ਸਿੰਘ ਰਾਏਸਰ,  ਅਸ਼ੋਕ ਭਾਰਤੀ ਅਤੇ ਪਿੰਡ ਰਾਮਗੜ੍ਹ ਤੋਂ ਵੱਡੀ ਗਿਣਤੀ ਵਿੱਚ ਪਾਠਕ ਅਤੇ ਸਰੋਤੇ ਹਾਜ਼ਰ ਸਨ।